Yaadein

Kabhi behte hue dard mein,
Kabhi thehre pani sard mein,
Kabhi jheel ki gehrai mein,
Kabhi raat ki tanhai mein,
Har patthar mein,har deewar mein,
Kabhi apne hi shringar mein,
Tera chehra cha sa jata hai,
Aur teri yaad dilata hai,
Mujhe sab kuch bhul jata hai,
Phir dard sa jagne lagta hai,
Kuch sard sa lagne lagta hai,
Phir parchayian bolti hain mujhse,
Aur tanhayian sisakne lagti hain,
Phir dard mera gehrata hai,
Aur saanse rukne lagti hain,
Jab yaad tumhari aati hai,
Main deewani ho jati hun,
Bas waqt sarakta rehta hai,
Main beete lamhe jeeti hun,
Tum door to mujhse itne ho,
Kyun bhool tumhe nahi pati hun,
Yaadon se tumhari main,
Khud apne dil ko tadpati hun,
Phir sochti hun kabhi kabhi,
Ye yaadein hain yaad aayengi,
Na jaane kyun aur kab tak,
Mere dard ko sehlayengi,
Yun waqt ka dariya behta hai,
Ek din to wo bhi aayega,
Yeh aata jaata waqt meri,
Yaadon ko baha le jayega,
Main nae rang nae sapno mein,
Inhe lesh matr na paungi,
Jhumungi main zindagi mein,
Ek din to mukt ho jaungi.